01 Aug Entrevista ku señora Magdonia (Doña) Sirvania

Señora Sirvania, mihó konosí komo Doña, a kuminsá traha na Fundashon Birgen di Rosario komo ‘bejaardenverzorgster’ na aña 1977 i el a traha 8 aña na Habaai. Después ku Doña a haña su yu, el a bin bèk na Habaai i traha 13 aña einan. Ora ku Doña a baha ku penshun, atrobe el a bin bèk pero den un otro forma.

Hende grandi ta fasiná Doña i semper el a traha ku hende grandi. Fundashon Birgen di Rosario a lanta diferente proyekto i pa e proyektonan nan tabata buska boluntario. E amor pa e trabou a keda kemen esei tabata nèt un kos p’é!

Pa e proyekto Huntu grandi den mi bario na Hòfi Wayaká, Doña ta yuda den kushina i tambe ku otro aktividatnan. Na 2004 Doña i su kolega Marbella Pieter a aserká Shell pa donashon, ya nan por a desaroyá e hòfi komo un lokalidat kaminda e grandinan di Habaai por sinta den un lugá nèchi i trankil ora nan tin aktividat. Ku e donashon di Shell, nan por a traha un flur, bañonan, kushina, bankinan i lugá pa sinta den sombra. Aktualmente Hòfi Wayaká, ta wòrdu usá pa diferente aktividatnan pa grandinan di Fundashon Birgen di Rosario i e hòfi tambe ta disponibel pa hür na otro organisashonnan ku ke us’é pa nan evento.

Na ougùstùs 2018, ta hasi 3 aña ku Doña huntu ku Candita Jamanika i Margriet Jonge a lanta e organisashon di penshonadonan pa Fundashon Birgen di Rosario. Adulto Seniornan Fundashon Birgen di Rosario a lanta pasobra nan a ripará  ku trahadónan ta separá for di otro ora nan baha ku penshun.

Aworakí tin mas ku 56 hende afiliá ku e organisashon i tin asta personanan ku ta wardando pa nan baha ku penshun pa nan drenta e organisashon. E miembronan ta paga solamente 10 florin pa luna komo kontribushon i nan ta hasi diferente aktividatnan manera charla edukativo i nan ta sali keiru por lo ménos un 5 pa 6 biaha pa aña.