26 Sep Ròlstulnan nobo pa grandinan

Riba dia 25 di sèptèmer e entrega ofisial a tuma lugá di ròlstulnan nobo na habitantenan di Huize Welgelegen (Habaai). Danki na e kontribushon finansiero di Banco di Caribe, Fundashon Birgen di Rosario por a kumpra kuater ròlstul i laga e ròlstulnan adaptá na e desabidat spesifiko i kurpa di e klientenan pa mehorá nan komodidat.

E direktora i presidente di Hunta di Direktiva, Indra Rossen-Lucacius, a enfatisá ku Fundashon Birgen di Rosario ta depende riba supsidio di gobièrnu, lokual no ta sufisiente pa kubri tur gastu.

“Nos mester ta kreativo ku nos fondonan limitá.  Pa redusí nos dependensia finansiero, nos mester traha riba otro opshonan di finansiamentu. Ku sosten di organisashonnan manera Banco di Caribe nos por sigui invertí den kalidat di kuido pa nos grandinan.”

E miembro di gerensia di Banco di Caribe, Fons Simon (CEO & General Managing Director), a indiká ku e banko ta duna sosten na diferente sektor manera entre otro hubentut, deporte i grandinan. E gerensia di Banco di Caribe ta konsiente di e importansia di un ròlstul bon i nan ta kontentu di por a kontribuí. Lizanne Bradshaw-Wason, hefe di lokalidat di Fundashon Birgen di Rosario, a splika ku e ròlstulnan mester wòrdu adaptá na e kurpa di e kliente, pasobra e kliente mester keda kómodo den e ròlstul, kaminda e ta keda pa un gran parti di dia.