A funda Richardushuis promé di mart 1954 i den pasado e tabata un kas pa hende hòmber, pero awendia ta ofresé alohamentu pa hende muhé tambe. A dediká nòmber di e kas akí na Frater Richardus, kende den pasado a hasi hopi trabou na bienestar di siudadanonan di edat.
Promé, Congregatie Broeders van Dongen tabata manehá e kas akí i na 1972 e kongregashon akí a disidí pa pasa e maneho pa Fundashon Bírgen di Rosario. Despues e Brudernan a keda estrechamente enbolbí ku bienestar di Richardushuis. Meta di e kas akí ta ofresé kuido, reaktivashon i guia sosial na hende grandi for di 60 aña pa promové kalidat di nan bida riba tereno físiko, mental i sosial.
Richardushuis ta duna kuido na hende grandi, dependé di e nesesidat spesífiko pa kuido. Tin hende grandi ku tin un sierto grado di independensia i pa e motibu ei no ta dependé totalmente di kuido, miéntras otronan tin mester di asistensia i kuido spesífiko. Ta pone e grandinan ku ta sufri di Alzheimer òf un otro forma di demensia den ún di nos sekshonnan sikogeriátriko, ku ta adaptá na e nesesidatnan spesial di e habitantenan akí.
Fundashon Birgen di Rosario ta disponé di un Servisio Médiko ku dòkter i enfermera kapas, ku bou di nan un spesialista pa hende grandi, ku diariamente ta den kas pa duna kuido. Habitantenan di Richardushuis por hasi uzo di un oferta di kuido kompleto ku ta konsistí di fisioterapia, terapia di egersisio i pedikür médiko di parti di profeshonalnan.
