Huize Welgelegen

A funda Huize Welgelegen, prinsipalmente konosí komo Habaai, 13 di yanüari 1943 i e ta e kas pa hende grandi intramural mas grandi ku Fundashon Birgen di Rosario ta manehá. E kas ta situá den un konbento di ántes ku Sùrnan di Roosendaal a regalá e Fundashon pa kuido di hende grandi. Meta di e kas akí ta pa ofresé kuido, reaktivashon i guia sosial na hende grandi for di 60 aña pa di e manera ei promové kalidat di nan bida riba tereno físiko, mental i sosial.

Huize Welgelegen ta duna kuido na hende grandi ku, dependé di nan nesesidat, ta hospedá den diferente departamentu. E grandinan mas independiente, ku pues mester di nada òf algu di guia, ta akomodá den departamentunan kaminda a adaptá kuido i aktividat na nan deseo i nesesidat.

Tin hende grandi ku tin un sierto grado di independensia i p’esei no ta kompletamente dependiente di kuido, miéntras otro tin mester di asistensia i kuido spesífiko. Ta pone e grandinan ku ta sufri di Alzheimer òf un otro forma di demensia den ún di nos departamentunan sikogeriátriko, ku ta adaptá na nesesidatnan spesial di e habitantenan akí.

Fundashon Bírgen di Rosario ta disponé di un Servisio Médiko ku dòkter i enfermera kapas, bou di kua un spesialista pa hende grandi, ku diariamente ta presente pa duna kuido. Habitantenan di Huize Welgelegen por hasi uzo di un oferta di kuido kompleto ku ta konsistí di fisioterapia, terapia di egersisio i pedikür médiko di parti di profeshonalnan. Danki na Fundashon Lus i Speransa, for di poko tempu pasá tin un kamber di hospisio spesialmente drechá pa kliente terminal ku ta biba den Huize Welgelegenpa pasa huntu ku nan famia den e periodo difísil akí, den un ambiente trankil i íntimo.

Tur djadumingu habitantenan i nan famia por asistí na e Santu Sakrifisio di Misa den e Kapèl na Huize Welgelegen. Ademas diariamente e guianan di aktividat ta organisá aktividat manera entre otro obra di man, landamentu, gemnastik, muzik i aktividatnan spesial rònt i riba dianan di fiesta. Sierto aktividatnan ta tuma lugá na Huize Welgelegen òf pafó di e kas. Tambe tin biaha ta selebrá eventonan ku otro kasnan.

Tur aña ta organisá un Dia di Famia, kaminda habitantenan por pasa e dia ku nan sernan kerí. Riba e dia akí ta permití famia pa trese un plato faborito di e grandi pa parti esaki ku nan mes famia òf ku otro grandinan.