Nos Organisashon
E kasnan di kuido ku e tin bou di dje– Richardushuis, Nos Lanterno i Huize Welgelegen, – tin hopi bon nòmber den komunidat. Fundashon Birgen di Rosario ta haña reakshon positivo di Klooster Alverna ku en komparashon ku e otro kasnan ta ofresé bibienda na hende muhé só.
Tambe su sentronan di pasadia pa hende grandi ku nesesidat di kuido na Pasadia Mi Amparo i Richardushuis, tin un lugá importante den komunidat di Kòrsou. E fundashon ta disponé di personal kualifiká i un palèt di servisio ku e ta ofresé na hendenan grandi ku un diversidat di nesesidat di kuido.
Fundashon Bírgen di Rosario ta afiliá na Fundashon Federashon di Institushonnan di Kuido loke ta bon pa e koperashon entre e fundashonnan afiliá i interkambio mutuo di konosementu. Pa mantené e kalidat di kuido na nivel, Fundashon Bírgen di Rosario tin un Servisio Médiko ku dòkter i enfermera kapas, bou di kua un spesialista pa hende grandi, ku diariamente ta presente pa duna kuido na un promedio di 425 hende grandi. Ademas ta duna fisioterapia, terapia di egersisio i pedikür médiko di parti di profeshonalnan na habitante i bishitante di e pasadia (70 hende grandi). Banda di esei, nos tin guia di aktividat den servisio, ku ta hasi diferente aktividat ku e grandinan. Aparte di esei, nos tin enfermero/a i asistente enfermero/a den servisio, ku di dia i anochi ta duna e kuido nesesario.
Kuido di hende grandi ta un punto di atenshon pa henter e komunidat di Kòrsou. P’esei nos ta mira komo nos responsabilidat pa hasi tur posibel pa na interes di grandinan sigurá nos kuido den futuro i sigui ofres’é na nivel.
